نرگس محمدینین نروژ مجلیسینه مئساژی : ایسلام جمهورییتی ایران خالقینین نومایندهسی دئییل
نرگس محمدی، اوین حبسخاناسیندان قیزی کیانانین نروژ مجلیسینده اوخودوغو مئساژدا دئییب کی، دونیا بیلمهلیدیر کی، ایسلام جمهورییتی ایران خالقینی تمثیل ائتمیر.
نروژده نوبل باریش اؤدولونون رسمی تقدیمات مراسیمیندن بیر گون سونرا نرگس محمدینین عائلهسی بازار ائرتهسی، ۲۰ آذرده نروژ مجلیسینین ایرانلی باشقانی مسعود قرهخانینین قارشیلاماسی ایله مجلیس بیناسینا گئدیب و مجلیسیده خاریجی ایلیشگیلر و ساوونما کومیتهلرنین ملت وکیللری ایله گؤروشوب.
نرگس محمدینین نروژ مجلیسینه گؤندردیگی مئساژدا دونیادان “قادین، حیات، آزادلیق” حرکاتینا دستک وئرمهلرینی ایستهییب. او، ایران خالقینین دینی و آوتوکراتیک حاکیميته قالیب گلهجهیینه امین اولدوغونو بیلدیریب.
او آرتیریب: دونیا بیلمهلیدیر کی، ایسلام جمهورییتی ایران خالقینی تمثیل ائتمیر و ایران خالقی باشقا اؤلکهلرله یاپیجی ایلیشگی قورماق ایستهییر.
۲۰۲۳-جو ایل نوبل باریش اؤدولو تقدیمائتمه مراسیمی بازار گونو، ۱۹ آذرده نروژین پایتاختی اوسلودا اؤدول آلانین ایشتیراکی اولمادان کئچیریلیب. بو مراسیمده حبسده اولان ایرانلی فعال نرگس محمدینین اؤولادلاری اونون آدیندان نوبل باریش اؤدولونو آلدیلار.
بو گون نروژین پایتاختی اوسلودا ایراندا اینسان حاقلاری اوزره نوبل باریش اؤدولو فورومونون ایجلاسی کئچیریلیب. شیرین عبادی، مهرداد درویشپور، الهه توکلیان، شیما بابایی و نازنین بنیادی ایراندا دموکراسی طرفداری حرکاتینین پئرسپئکتیولرینی موذاکیره ائدنلر آراسیندا ایدی.
حوقوق ساوونوجوسو و نوبل باریش اؤدولو قازانانی شیرین عبادی مراسیمده دئییب: ایراندا قادینلارین آیری-سئچکیلیک دورومو گونئی آفریقاداکی آپارتاید رئژیمینه بنزهییر.
اویونچو و اینسان حاقلاری فعالی نازنین بنیادی ده بو گؤروشده اؤتن ایل ایرانلیلارین ایسلام جمهورییتینه قارشی عومومی اعتراضلارا ایشاره ائدهرک دئییب: ایراندا اصلاحاتلار اؤلوب و اینسانلارین چوخو دینی اولمایان دموکراسی ایستهییر.
باریش نوبل اؤدولو اوتوروموندا ایران اعتراضلاریندا گؤزوندن یارالانان الهه توکلیان و حوقوق ساوونوجوسو شیما بابایی ده چیخیش ائدیب.
بو گؤروشده اولوسلارآراسی عفو تشکیلاتینین باش کاتیبی انیس کالامار دا بیر سیرا ساخلانیلان و محبوسلارا قارشی تجاووز و شدتلی زوراکیلیقدان دانیشیب.
#ایران_خبرلری #نرگس_محمدی