بیز نئجه بیرلیک یاراتمالی‌ییق؟- سانای ائلداش
آزربایجانلی قادینلارین گوجو و ملی حرکتمیزین گوجسیز نوگته‌سی
آزربایجانلی قادینلارین بیرلیگی سون ایل‌لرده گئتدیکجه داها چوخ دانیشیلماسی گرکن بیر مسئله‌دیر. بیزیم آرا‌میزدا یازی یازان، سوسیال مدیادا فعّال اولان، قادین حقوقلارینی و آزربایجانین دیلینی، فرهنگینی ساوونان چوخلو قادین وار. آمما بونا باخمایاراق، بیر-بیریمیزی دستکلمکده و بیر-بیریمیزین سسینی گئنیشلندیرمکده هنوز ده چتینلیک یاشاییریق.
مسئله‌میز قادینلارین آز اولماسی دئییل. مسئله، بیر-بیریمیزین فرقلیلیگینی قبول اتممک و سیاسی، اجتماعی یا حتی شخصی اختلافلارا گؤره بیر-بیریمیزی اوزاقلاشدیرماقدیر.
۱. سیاسی فرقلیلیکلر بیزی دوشمن اتمملیدیر
آزربایجانلی قادینلارین آراسیندا فرقلی سیاسی دوشونجه‌لر وار. کیمی بیرلشمیش آزربایجان ایسته‌ییر، کیمی فدرالیسمی، کیمی جنوبی آزربایجانین استقلالینی، کیمی ده ایرانین ائچینده برابری و دموکراسی‌نی.
بو فرقلیلیکلر طبیعی‌دیر. هر کسین اؤز سیاسی دوشونجه‌سی اولابیلر. آمما فرقلی دوشونمک، بیر-بیریمیزی دشمن گؤرملی اولدوغوموز معنی‌سینه گلمیر.
فدرالیسمی ساوونان بیر قادینلا استقلالی ساوونان بیر قادینین سیاسی دوشونجه‌لری بیر اولمایا بیلر. آمما اونلارین اورتاق اولدوغو چوخلو نوگته وار: آزربایجان تورکجه‌سی، فرهنگ، آزربایجانلی کیم‌لیگی و قادینلارین حقوقو.
بیز حامی اولدوغوموز سیاسی یولو ساوونا بیلریک، آمما باشقا بیر قادینین سسینی بوغماق مجبوریتینده دئییلیک.
۲. «بیزدن دئییل» دوشونجه‌سی بیزی گوجسیز ائدیر
بیر قادین فرقلی سیاسی موضعی ساووناندا، اونون یازدیغی یازینی لایک اتممک، شیر اتممک و حتی اونونلا دشمنلیک اتمک، بیزیم اورتاق گوجوموزو آزالدیر.
بیر قادین قادین حقوقلارینی ساوونورسا، اونون سیاسی دوشونجه‌سی بیزیمکیندن فرقلی اولسا دا، اونون سسینی گئنیشلندیرمک آزربایجانلی قادینلارین اورتاق گوجونه خیدمت ائده بیلر.
چونکی بیر-بیریمیزی قبول اتمک اوچون حتماً بیر-بیریمیزله همفیکیر اولماغا احتیاج یوخدور.
۳. قادینلارین طبقه‌لره بؤلونمه‌سی لازیم دئییل
بیر قادینین ملی یا اجتماعی حرکته قاتیلماسی اوچون حتماً آکادمیک مقاله‌لر یازماسی گرکمیر.
بیر قادین جنایت پرونده‌لریندن دانیشا بیلر. باشقا بیر قادین مودادان، گریم‌دن دانیشا بیلر. بیر قادین پیشیگیندن پایی‌لاشا بیلر. باشقا بیر قادین حامام لیفی توخویور و ساتیر.
اونلارین هئچ بیری آزربایجانین بیر فردی و پارچاسی اولماقدان چیخمیر.
مثلاً یوز مینلرله ایزلی‌ییجیسی اولان بیر قادین هر گون جنایت پرونده‌لریندن دانیشیرسا و بیر گون آزربایجان تورکجه‌سی، آزربایجانین فرهنگینی یا ملی حرکتی ساوونان بیر استوری پایی‌لاشیرسا، بو کیچیک بیر حرکت دئییل.
اؤلدورمه‌دن، گؤرونوشدن یا سیاستدن دانیشماقدان دا بیر قادینین دیلیمیزی ایستیفاده اتمه‌سی اوزون‌لویونده چوخ بؤیوک بیر خیدمت‌دیر.
۴. قادینلارین بیرلیگی سادجه قادینلارین ایشی دئییل
کیشی‌لرین و ارکک‌لرین چوخو برابریلیدن دانیشیر. آمما برابری سادجه سؤزله اولمور.
اگر بیر کیشی حاقیقتن قادینلارین ملی و اجتماعی حرکتین ایچینده اولماسینی ایسته‌ییرسه، حیات یولداشینی، پارتنیری‌نی، قیزینی، باجیسینی و یا دوستونو بو فضایا گتیریشین گَرکدیر.
او قادینین آلی تحصیلی اولمایا بیلر. سیاستله ماراقلانمایا بیلر. حتی اونون هنری سادجه حامام لیفی توخویوب ساتماق اولابیلر.
بو اونون آزربایجانین بیر فردی و پارچاسی اولدوغو حقیقتینی دَییشمیر.
بیز قادینلارین حاضیر اولماسینی گؤزلَمَمَلی‌ییک. اونلارین الیندن توتمَلی و بیرلیکده بو حرکته قاتمالی‌ییق.
۵. سیاسی حرکتله یاناشی، اجتماعی شور دا یاراتمالی‌ییق
حرکت سادجه مقاله، میتینگ، سیاسی دانیشیق و سئچیم‌لردن ایبارت اولسا، چوخلو اینسانین او حرکته یاقینلاشماسی چتین اولار.
تراختور طرفدارلارینا باخاق. فوتبال اطرافیندا یارانان شور، گنج‌لری بیر آرا‌یا گتیریر. اونلار استوری پایی‌لاشیر، سلفی چکیر، موسیقی قویور، رقص ائدیر و اؤزلرینی او حرکتین بیر پارچاسی کیمی گؤرورلر.
آزربایجانلی قادینلار اوچون ده بئله بیر اجتماعی و فرهنگی فضا یاراتماق لازیمدیر.
حرکتین گوجو سادجه یازی یازان و سیاسی بحث ائدن اینسانلارلا اولچولمور. حرکت، اوزونه گئنیش بیر اجتماعی گوج قوشماقدیر.
۶. بیزه بیر آزربایجانلی قادینلار شبکه‌سی لازیمدیر
طلاق اولموش بیر قادین، اؤز حیاتینی اؤز ایسته‌دییی کیمی یاشایان بیر قادین، باشقالارین قبول اتمه‌دییی بیر حیات شکیلینی سئچن بیر قادین یا سادجه گونده‌لیک حیاتینی یاشایان بیر قادین دا بیزیم جامعه‌نین بیر پارچامیزدیر.
بیز اونلارین حیات شکیلینی بئیَنمه‌دیییمیز اوچون اونلارین سسینی یوخ سایمالی دئییلیک.
اؤزگه حرکت‌لرده چوخ فرقلی اینسانلارین بیر آرا‌یا گتیریلدییینی گؤروروق. بیزیم ده بو قاپی‌لارین آچیق اولماسی گرکدیر.
بیزه بیر «آزربایجانلی قادینلار شبکه‌سی» لازیمدیر؛ سیاسی دوشونجه‌سی، یاشی، تحصیلی، ایشی و حیات شکیلینی فرق ائتمه‌دن قادینلارین بیر آرا‌یا گلمه‌سینی مومکون ائدن بیر شبکه.
نتیجه
آزربایجانلی قادینلارین اساسی مسئله‌سی سایی‌نین آز اولماسی دئییل. اساسی مسئله‌لردن بیری بیر-بیریمیزین سسینی گئنیشلندیرمک یئرینه، بیر-بیریمیزی محدود اتمَییمیزدیر.
هامی‌میزین سیاسی فیکری بیر اولمالی دئییل.
هامی‌میزین حیات شکیلی، تحصیلی، ایشی و سوسیال محیطی ده بیر اولمالی دئییل.
آمما هامی‌میز آزربایجانین بیر فردی و پارچاسی اولدوغوموزو بیلمَلی‌ییک.
اگر آزربایجانلی قادینلارین گوجونو آرتیرماق ایسته‌ییرسک، اولا بیر-بیریمیزین سسینی کسمکدن ال چکمَلی‌ییک.
بیرلیک همفیکیر اولماق دئییل.
بیرلیک فرقلی اولانلارلا یاناشی دورا بیلمکدیر.
