آذربایجانین سویملی شاعره سی «سحر» ، حمیده خانم ریئس زاده، ابدیته قووشدو
“سحر” 1331نجی ايلده محتشم اردبيل دياريندا دنيايه گوز آچدی،بير زمان آياق توتوب مدرسه يه گئتدی، آخر(ایقتیصاد) رشته سينده ديپلم آلماغا ال تاپدی.سحرين يازديغی شعرلر اولدوقجا زنگين و محتوالی دير،اوست-اوسته شعرلرينين “سمبوليک” حالتی وار.انون ايستر فارسيجا،ايستر تورکجه يازديغی اثرلرده تازا مضمونلار،مرمرتک يونولموش کلمه لر،ائل لغتلری ايشه آپاريليب.سحرين غزللرينده جامعه ميزين ديلکلری،دردلری،طلبلری ترنم ائدير.
حسرت ياش اولوب گوزللره دولماقدادی،دای گل!
گوزياشلاری آخماقدا سئل اولماقدادی،دای گل!
هجران توری دونيانی قفس تک بورويوبدور
دنياکيمی ،باغريمدا دارالماقدادی،دای گل!
سال داغلارا های،گؤيده بولودلار ديله گلسين
ياپراق کيمی وارليق بويو سولماقدادی،دای گل!
هجرينده گئچن لحظه لری يانقلی سازتک
غم پنجه سی،آه زخمه سی،چالماقدادی،دای گل!
سنسيزليگه دؤزمک نه ساياق ممکن اولارميش
دؤزودوم،دؤزوموم جانيمی آلماقدادی،دای گل!
گل قوی گؤنشين بايداسی دنيايه جالانسين
باغريمدا قارانليق ايزی قالماقدادی،دای گل!
ياتماز، يولونو گؤزلريم اولدوزکيمی گؤزلر
گؤزلر کؤکو، حسرتله سارالماقدادی،دای گل!
هرگؤن “سحر” آدديملارينين ماهنيسين ايزلر
آچميش سحرين باغری قارالماقدادی،دای گل!
چاغداش قادينلاريميز ايچره گؤزل و دويغولو شعرلر يازماقلا شهرت تاپان و اوخوجولارين نظرينی اؤزونه جلب ائدن شاعره لردن بيريسی حميده رئيس زاده دير کی شعرده “سحر” تخلص ائدير.
خاطره سی ابدی اولسون
https://minsoz.ir/hamideh-raiszadeh/ayli-bakhish
#آذربایجان
