8 مارت بین الخالق قادینلار گونو موناسبتیله بیانات

8 مارت دونیادا قادینلارین برابرلیک، عدالت و اینسان لیاقتی اوغروندا بیر عصردن آرتیق دوام ائدن موباریزه سینی خاطیرلادیر. بوگونون کؤکو ایگیرمینجی عصرین اوللرینده قادین ایشچی لرین موباریزه سینه دایانیر؛ قادینلار سس وئرمه حقی ، عدالتلی ایش دورومو و آیری سئچکیلیک یاپیسینین سون بولماسی طلبی ایله آیاقا قالخدیلار. آمریکادا قادین ایشچی لرینین تعطیل آکسیالاریندان توتموش،1910 جوایلده سوسیالیست قادینلارین بین الخالق کنفرانسیندا بو گونون رسمی شکیلده قید اولونماسی نین تکلیف ائدیلمسینه دک، 8 مارت قادینلارین ظولمه و برابرسیزلیگه قارشی گلوبال هم رای لیگین سیموولونا دؤنوشموشدور.

بو گون بیز ایران قادینلاری؛ تورک، کورد، عرب، بلوچ، لر، گیلک و بو توپراقین دیگر میللت و کولتورلرینه منسوب قادینلار اولاراق، اؤلکه میزین اؤنملی و تاریخی دئیشیکلیک لرعرفه سینده اولدوغو بیر زاماندا بو گونو قوتلاییریق . ایران موختلیف لیگین اؤلکه سی دیر؛ دیللرین، کولتورلرین و کیملیک لرین زنگین اولدوغو، بو جغرافیانین تاریخینین قورولماسیندا هامیسینین پایی اولدوغونون بیر بؤلگه دیر. ایران دا قادین مسئله سی اؤلکه مقیاسیندا اولان بیر مسئله دیر. لاکین عینی زاماندا ، میللی، دیل، صنفی و بؤلگه سل آیری سئچکیلیکله، دیرین شکیلده باغلی دیر.

ایرانین معاصیر تاریخی گؤستریرکی، قادین مسئله سی هئچ واقت اساسلی و کؤکلو شکیلده حل اولونمامیشدیر.

پهلوی لر دؤورونده بعضی حقوقی و ائگتیم دوزنلمه لرحیاتا کئچیریلسه ده، گنیش ساوادسیزلیق، ارکن یاشدا ائولیلک، اوجقار بؤلگه لرده یاشایان قادینلارین تحصیل و ساغلیق خدماتیندان محروم قالماسی،ائلجه ده درین صینفی اوچوروما سبب اولماسی دانیلماز بیر گرچک دیر.

مرکزچی ائشیدسیزلیگین گئنیشلنمه سیاستی، جغرافی و ایجیتیماعی باخیمدان حاشیه ده یاشایان بیر چوخ قادینی ان تمل حاقلاریندان بئله محروم ساخلامیشدیر.

ایران ایسلام جمهوریتی قورولدوقدان سونرا بو سورونلار نه اینکی یاپیسال باخیمدان آرادان  قالدیریلمادی، عکسینه، آچیق شکیلده، قادین و علیهینه اولان قانونلار رسمی و شرعی چرچوه سینده درینیلشدی. ائلجه ده جینسی آیری سئچکیلیک، میراث، شاهیدلیک، حیضانت حقی، زورونلو گیینیش، مسلک و اجتماعی قیسیتلامالار کیمی مختلف ساحه لرده قانونی لشدیریلدی و بو گون قارشی قارشیا اولدوغوموز دوروم جمعیتین یاریسینی ایکینجی درجه لی وطن داش کیمی تعیین ائدن بیر نوع جینسی آپارتایددیر. بیر چوخ محروم بؤلگه ده ارکن یاشدا ائولیلیک، تحصیل یوخسوللوغو و ایقتیصادی محرومیت هله ده قیزلارین حیاتینی، محدودلاشدیریر و اونلارین طالعینی ایلک باشدان معین ائدیر.

بو گون 8 مارتی قوتلارکن، ایرانین گلجگی حاققیندا مختلیف سسلر ائشیدیلدیگی بیر دؤوردییک.

بو شرایط ده درین بیر نیگرانلیق وار، اودا بودور کی خاریجدن معین اللر و یا بعضی گوجلر مرکزچی و ولایت فقیه پرنیسیلبینه اساسلانان بیر فاشیزیم فورماسینی باشقا بیر مرکزچی و خاندانلیق فاشیزم مدلی ایله دئیشدیرمگه  چالیشا بیلرلر. حالبوکی بو مدل داها اؤنجه تجربه ائدیلمیشدیر. حاکمیتین سیماسینین دئییشمه سی، آیری سئچکیلیک یارادان یاپیلانمالار دئییشمه دیگی مددت ده، قادینلارین و دیگر کنارا ایتدیریلمیش قوروپلارین آزادلیغی اوچون هئچ بیر تامینات یارادمایاجاغدیر.

بیز اینانیریق کی، قادینلارین آزادلیغی توپلومون آزادلیغیندان آیریلمازدیر. حاکمیتین داواملی مرکزلشمه سی، یاپیسال آیری سئچکیلیک، کولتورل چئشیدلیلیگین بوغولماسی و حقوقی برابرسیزلیگین سوردوگو هئچ بیر توپلوم، جینسی برابرلیگینه نائیل اولا بیلمز. ایران قادینلاری اوچون عدالتلی گلجک یالنیز دموکراتیک، سکولار، غیری مرکزلشدیریلمیش و اینسان حاقلارینا صادیق بیر سیستم چرچوه سینده مومکون دور؛ ائله بیر سیستم کی، اورادا بوتون وطن داشلار جینسیتیندن، ائتنیک کیملیگیندن، دیلیندن، دینین دن و یا جغرافی منشعیندن آسیلی اولمایاراق برابر حقلره صاحیب اولسونلار.

8 مارت بیزیم اوچون تکجه سیموولیک بیر گون دئییل؛ بو تاریخی مسئولیتیمیزی خاطیرلاتما گونودور. بیز بیر بیریمیزین یانیندا، چئشیدلیلیگی قورویاراق و فرقلره حؤرمت ائدرک، بئله بیر ایران اوچون چالیشیریق کی، اوردا هئچ بیر قیز جینسیتینه گؤره تحصیلدن محروم قالماسین، هئچ بیر قادین حاقسیز قانونلارا گؤره آلچالدیلماسین و هئچ بیر اینسان کیملیگینه گؤره کنارا آتیلماسین. بیز بو توپراقین تورک قادینلاریندان عیبارت اینتر سئکسیونال فئمنیزمه اینان تورک قادینلار مرکزی اولاراق، بو ایل بین الخالق قادینلار گونونده بونلاری هایقریریق:

-هر طور دئسپوتیزمه سون!

– جینسی آپارتایدینا سون!

– یاشاسین دموکراتیک، آزاد، سکولار و غیری مرکزلشدیریلمیش ایران!

تورک قادینلار مرکزی

9 ایسفند 1404

28 فورال 2026