ايران ساغليق سيستمي 165 مین طب باجیسی چاتیشمازلیعی ایله اوز اوزه دیر
ایران عالی طب باجیلاری شوراسینین باشقانی قاسم ابوطالبی،اؤلکهده ۱۶۵ مین طب باجیسینین چاتیشمازلیغینی بیلدیریب. بونونلا عینی واختدا، ساغلیق ناظرلیگینین طب باجیلاری اوزره معاونی عباس عبادی طب باجیلارینین امکحاقی بورجلارینین اؤدهنیلمهسیندهکی گئجیکمهلری بودجه سندلرینین آیریلماماسی و سیغورتا شرکتلرینین سوروملولوقلارینی یئرینه یئتیرمکدهکی گئجیکمه ایله ایضاح ائدیب.
ابوطالبی ۳۰ مهرده شیرازدا کئچیریلن “طب باجیسی گونو” مراسیمینده دئییب: “ایراندا طب باجیسینین خستهخانا تختینه نیسبتی ۰،۹-دور، حالبوکی آلتینجی گلیشمه پروقرامینین سونونا قدر بو گؤستریجینین ۱.۸ چاتدیریلماسی نظرده توتولموشدو.”
او، دونیادا اورتا حسابلا هر خستهخانا تختینه اوچ طب باجیسینین دوشدویونو وورغولاییب و آرتیریب: “حاضردا اؤلکهده ۱۶۵مین طب باجیسی فعالیت گؤستریر، آما عینی سایدا یئنی طب باجیسینین ایشه قبولونا احتیاج وار کی، ساغلیق مرکزلریندهکی چاتیشمازلیق آرادان قالخسین.”
ابوطالبینین سؤزلرینه گؤره، ساغلیق ناظرلیگی هر ایل ۱۵ مین طب باجیسینین ایشه قبولو اوچون پلان حاضرلاییب و بو لاییحه حاضردا تصدیق مرحلهسیندهدیر.
بوندان اؤنجه، ۱۴ مهر تاریخینده ایران طب باجیلاری ائوینین باش کاتیبی محمد شریقیمقدم بیلدیرمیشدی کی، آغیر ایش شرایطی، روحی باسقیلار و امکحاقی برابرسیزلیگی بیر چوخ طب باجیلارینی بو پئشهدن سویودوب و اونلار خستهخانالاردان آیریلماغین یوللارینی آختاریرلار.
شریقیمقدم ایراندا طب باجیلیغی ساحهسیندهکی دورومو “بؤحرانلی” آدلاندیراراق قئید ائدیب کی، ساغلیق سیستمی کسکین کادر چاتیشمازلیغی ایله موباریزه آپاردیغی بیر واختدا، اؤلکهده ۶۰ میندن چوخ طب باجیسی ایشسیزدیر و طب باجیلیغی فاکولتهلرینین قبول سهمیهلری هر ایل آرتیر.
#ایران_خبرلری #عومومی_ساغلاملیق
