پامپاس توكلری (حكایه) – یازان :نورلانه ایشیق کوچورن:ویدا حشمتی حاضیرلایان:ادبیات سئونلر

حكیم دانیشمیردی. واراقینی ایكی الی‌له توتوب بوتون جدّیّتی‌یله اورەیین‌ده اوخویوردو. هردن ده نوقطەدن اوّلكی منطقی وورغولو سؤزو سسلی تكرارلاییردی.
یالنیز خسته مداخله ائتدیکدە باشینی قالدیریردی.
خسته:
– اوردا ائله یازیلیب ائ، من ائله حیس ائتمیرم آخی. اونكولوگوم(سرطان متخصصی) دئدی كی، سن آرتیق ساقالمیسان، قارین بوشلوغونا بیر بالاجا سو یغیلیب. او دا باشقا حكیم‌لیك‌دی. باخ، بو اوخودوقلارینیزین هئچ بیری من‌ده یوخدو. UZİ(سونوگرافی) KT( سی تی اسکن) سهو گؤستره بیلر، دوكتور؟
حكیم دقّت‌له قادینین اوزونه باخیب سوروشدو:
– نه یوخدور سیزده؟
خستەنین دیلی توپوق ووردو:
– آغری. آغری یوخدور، دوكتور، منه ائله گلیر، اوردا چوخ شیشیردیب‌لر. من اؤزومده او علامت‌لری سئزمیرم.
– لاپ یاخشی. اشتهانیز وار؟
– هە، من اشتهالی بیری‌یم. هردن اولمور…
– داها چوخ هانسی حاللاردا؟
– مثلا، بو گون بیری، ائله یوخدور، ناراحاتام آخی. بیر ده قورخاندا اولمور…
– طبیعی‌دیر، بیزیم یاشدا خستەلر داها چوخ قورخاق اولور. ان چوخ نه‌دن قورخورسوز؟
– «خرچنگ» سؤزونون اؤزوندن.
– هە، او سؤزدن هامی قورخور. بیلیرسیز، اصلین‌ده، هامی دا آخیر دا اوندان اؤلور. هامی دئیندە، اکثر اینسانلار… ساده‌جه دیانقوز فرقلی قویولور، آما یاشلاندیقدا او پروسس گئدیر انسان‌دا.
– اؤزونوزو ان چوخ نه واخت یاخشی حیس ائدیرسیز؟
– آداملارلا دانیشاندا. اوّل‌لر اؤزومه تزه پالتار آلاندا لاپ یاخشی حیس ائدیر‌دیم. آما ایندی دانیشاندا.
– طبیعی كی، دانیشماق انسانی راحتلادیر. دانیشین، اورەیینیز ایسته‌دیی قدر، بو كی پوللا دئییل.
هر ایكیسى گولور.
خستە یئنە بوشلوغا باخیر. بیر‌دن:
– دوكتور، ساچلاریمین تؤكولمەیی ده منی ناراحات ائدیر، – سؤال دولو نظرلرله حكیمه باخیر، – نه علاج قیلیم؟ بیلیرسیز، من هلە ایشه چیخیرم، پئنسیا‌یا(امک‌لی‌لیک) وار. آدام بیر آز اوتانیر شاگردلرین قارشی‌سینا بئله چیخما‌غا.
قادین الی‌یله كولك‌ده قالخیب، بیز‌_بیز دورموش سئیرك توكلرینی آرخایا دوغرو چكدی.
اونو مشاهدە ائدن حكیم:
– بو، بیر آز دا یاشلا باغلی‌دیر، – دئییب یئنیدن كاغیذا گۆز گزدیردی.
خستە:
– دوكتور، سیزین ساحەیە عایید اولان حصّەنی اوخودوز؟
– ائله اورانی اوخویوردوم.
حكیم ورقی لاپ اوزونه یاخینلاشدیر‌دی. صفتی جدّی گؤركم آلدی.
– دوكتور، آغ‌‌جییر حكیمی دئدی كی، سیزین خستەلیگیزی بؤیودوبلر. من‌جە ده، ائله‌دیر، چونكی من اوردا یازیلانلارین هئچ بیرینی حیس ائتمیرم. من‌ده پرابلم یالنیز بیر شئی‌دیر…
حكیم باشینی قالدیر‌یب، خستەنین اوزونه باخیب، یئنە دیقّت‌له اونو دینله‌دی.
بایاقدان سسینی چیخارمایان، پنجرەنین یانین‌داكی كؤهنه كریسلو‌دا(تک کیشی‌لیک مبل) اوتوروب گؤزله‌ین جوان خانم دئدی:
– آنا، فیكرینی یاییندیرما دوكتورون، قوی آخیرا كیمی اوخوسون.
حكیم:
– یوخ، عیبی یوخ. من ساده‌جه بئینیم‌دە تحلیل آپاریرام، – گؤزلویو چیخار‌یب دئدی، – عمومیّت‌له، اینسان اؤز بدنینی موشاهدە ائتمەلی‌دیر. خستە اؤزو، اؤزو حاقیندا داها دقیق معلومات وئریر، – حكیم كاغیذی اورتادان قاتلاییب كنارا قویدو.
قادین داها دا اورك‌لنیب آیاغا قالخدی،
– باخین، دوكتور، تام بو حصه‌ده الیمه نه‌سه دگیر. شیش كیمی… آما منه آغری وئرمیر، – كؤینەیینی آشاغی سالدی، – من، بیلیسیز، آغریمیرام هئچ… هر ایشی ده اؤزوم گؤرورم، ایكی گوندور كی، یورویوش ائتمیرم، او دا ساغ آياغیم شیشیب دئیه اولا بیلر. سیزجە ده، آرتیق شئی‌لر یازیب‌لار كاغیذلاریم‌دا؟
– آرتیق شئی‌لر؟
– مثلا، پاتالوژی… تؤرەمه… آغ‌جییر پروفسور‌ دئدی كی، سن‌دە هیچ نه یوخدور، جییرینه جزئی سو یغیلیب، كئچیپ کئچه‌جک. آنتی‌بیوتیك یازدی.
حكیم كاغیذین یوخاری حصه‌سین‌ده یازیلانی اوخودو،
– دوز ائدیب آنتی‌بیوتیك یازماقدا، – دئدی، – اونا عایید حصه‌دە بو طلب اولونور.
– بس سیزه عایید حصه‌دە نه طلب اولونور، دوكتور؟
– ایندی سویونارسیز، گوزگویله باخاجام. یان اوتاغا كئچك، زحمت اولماسا.
– آنا، من چؤلە چیخا بیلەرم؟ سو آلاجام.
– هە، قیزیم، گئت، گئج گلمە آما.
قیز اونلارین آرخاسینجا باخیب، سونرا اوتاقدان چیخدی. یولو كئچن كیمی مئشە‌ پاركا دوشدو. پاركی ایكی باغبان سولا‌ییردی. الینی شیرهاشیرلا آخان سویا وورماق ایسته‌سه ده، فیكرینی دییشیب خیابانلا آشاغی یورودو.
یاشیل طبیعی آركونون(طاق کیمی دالان) آلتین‌داكی سكامیا‌دا(صندل_نیمکت) اوتوروب، خفیف كؤلك‌ده یارپاقلاری خیشیلدایان آغاجلارا باخیب دوشوندو:
«آنامی بورا گئتیرجەیم، خوشلاییر بو جور رنگارنگ‌لییی. نه قدر آغاج وار بوردا. آ، بیر باخ ائ، آنامین خوشلادیغی پامپاس(اوتون آدی علف نقره‌ای) اوتو دا وار كی».
قیز قوجا‌غینداكی چانتانی سكامیا‌دا قویوب، گولله كیمی، اوزانمیش پامپاسا دوغرو قاچدی.

بارماقلاری اوجونا قالخیب، اونون تئل حالوا كیمی یوپ‌یوموشاق توكلرینه توخوندو:
«آنام محلە‌نین اورتاسینا اكمك ایسته‌ییردی بوندان… گؤرسە، سئوینه‌جک…»
پاركین آشاغی حصه‌سینه جوربه‌جور گوللر اكیلمیشدی، باغبان سو شیلانكینی دارتا‌ – دارتا اورا دوغرو آپاریردی.
«آنام گؤره‌سن، بو گول‌لری گؤروب یئنە باغبان‌دان ایسته‌یه‌جک؟ هارا گئتسە، اؤز حیاتی اوچون گول ایسته‌ییر آخی. بیلسه‌یدیم، بایاق ائله بو یوللا گئتیر‌ردیم اونو. بو نه آغاجی‌دیر، گؤرەسن؟ آنام بیلر، او بیولوژیا درسین‌دە كئچیر بو نوع‌لرین هامی‌سینی. پیش‌ – پیش، گل بورا، پیش‌ – پیش… مییولداییرسان، جان، یئمه‌ییم یوخدور آخی اوستومدە…»
کورن پیشیك(نارینجی یا ساری پیشیک) آياقلارینا سورتونوب، سئویملی سس چیخاریر‌دی.
تئلفونو زنگ چالیر‌دی، قیز اوتوردوغو یئرە قاییتدی.
– قیزیم، چیخمیشام. سن هارداسان؟
– آنا، گلدیییمیز یولو كئچ، منی گؤره‌جكسن. پارك وار ایمیش بوردا. یوخاری باخ، «مئشە پاركی» یازیلیب.
قیز اوزویوخاری قالخدی. آناسینا ال ائله‌دی.
قادین یولو تلەسیك كئچدی، ماشین‌لاردان بیری سیگنال وئردی.
– آنا، گؤر نه گؤزل پارك‌دیر. بو وقتا كیمی نه‌یه بیلمه‌میشیك بئله پارك وار؟! گل، سنه گول‌لری گؤستره‌جەیم. هلە گؤر نه تاپ‌میشام بوردا.
– سكامیا وار؟ اوتوراردیق بیر آز.
– هە، اودور قارشی‌دا، سالخیم سؤیودون آلتين‌دا دایره‌وی اوتوراجاق، گئدك اورا. حكیم نه دئدی؟
– دئدی، سیدیك آنالیزی‌ وئر، بیر ده گل…
قادین بوشلوغا باخان كیمی باخیر‌دی اطرافا.
– آنا، سالخیم سؤیود اثرینی خاطیرلادین؟ بو، او آغاج‌دیر؟
– هانسی؟ هە، سؤیوددور.
– بایاقدان او هوندور آغاجا باخیرام، آنا، یارپاقلارینین هر اوزو بیر رنگ‌ده‌دیر، سن بیلیرسن آدی نه‌دیر؟ – قیز الینی ساغا اوزاتدی.
خسته قادین اوزون-اوزادی آغاجا باخدی. آما اونو گؤرموردو، آغاجدان چوخ‌-چوخ او طرفه باخیر‌دی. هاندان‌هانا دیللندی:
– بیلمیرم كی. ایسته‌ییرسن، دور گئدك واختین‌دا، باشیم فیرلانیر نه‌سه…
– اوندا پاركین آشاغی‌سی‌یله گئدك، بیر گول‌لر وار كی… سنه بیر شی گؤستره‌جەیم.
قادین كیریمیش‌جه آياغا قالخیب، قیزینین قولو‌نا گیر‌دی.
اونلار گول خیابانین‌دان كئچدیلر.
– باخ، آنا، بو دا سنین باغ‌دا اكمك ایسته‌دییین پامپاس. باغبان‌دان سوروشا‌ق، نئجه یئتیشر‌دیر‌یرلر بونو؟
قادین دیم‌دیک اوزانان اوتا باخدی،
– اونون باشیندا منیمكیندن چوخ توك وار، – دئییب، یولونا داوام ائتدی.
قیز، آناسی‌نین كولك‌ده یئللەنن، اولدوقجا سئیرەلمیش، ناتاراز ساچلارینا باخدی، گؤز یاشلارینی ایچیندە بوغما‌غا چالیشدی.