20 ياشيندا بلوچ قیز زاهیداندا آتاسی طرفیندن قتله یئتیریلیب
بلوچیستان خبرلرینی ایشیقلاندیران “حالوش” حوقوق-مودافیه مئدیاسینین وئردیگی بیلگیلره گؤره، نسیبه خالاسی اوغلو اولان حیات یولداشی ایله موباحیثهدن سونرا آتا ائوینه قایتاریلیب. قاییناتاسینین واسطهچیلیگی ایله یئنیدن عائله حیاتینا دؤنمک ایستسه ده، آتاسی بو نیکاحین داوام ائتمهسینه قارشی چیخیب و آرالاریندا ایختیلاف یارانیب.
بیلگیلی قایناقلارین دئدیگینه گؤره، نسیبه گوجلو باش آغریسی سببیندن اوتاقدا ایستراحت ائتدیگی واخت، گوناورتا ساعت اوچ جیواریندا آتاسی طرفیندن آچیلان آتش سونوجوندا حیاتینی ایتیریب. حادثهدن سونرا قاتیل آتاسی سلاحلا بیرلیکده قاچیب و هله ده حبس ائدیلمهییب.
“حالوش”ین یازدیغینا اساساً، نسیبه ۱۸ یاشیندا عائله قورموشدو و بو نیکاحدان تخمیناً ۱ یاشلی بیر اوشاغی واردی. او، محدودیتلر سببیندن شخصی موبیل تلفون بئله ایستیفاده ائده بیلمیردی و دفعهلرله حیات یولداشی ایله موباحیثهلر یاشامیشدی. یاخینلاری اونو “مظلوم بیر قیز” کیمی تانیدیقلارینی بیلدیریبلر. آتاسینین بو قتلی تؤرتمکده موتیوی هله ده بللی دئییل.
بو قتل نسیبهنین آزیاشلی اؤولادینی آناسیز وبلیرسیز دوروما قویوب. اوزمانلارین خبردارلیغینا گؤره، بو دوروم کؤرپهنی جدی روحی و سوسیال تراومالارا معروض قویا بیلر.
“حالوش” خاطیرلادیر کی، حوقوق-ساوونما قوروملاری دفعهلرله ایراندا عائله ایچی زوراکیلیغا قارشی ساوونما مکانیزملرینین اولماماسی بارهده خبردارلیق ائدیبلر. بلوچیستان و باشثا یوخسول بؤلگهلرده یوخسوللوق، ایشسیزلیک، ماده باغیملیلیغی و سوسیال خیدمتلرین اولماماسی عائله ایچی گرگینلیکلری درینلشدیریر و بعضاً دهشتلی فاجعهلرله سونوجلانیر.
#قادین_حوقوقلاری #قادین_جینایتی
