اورميهلی اکیزلر “ايلكاى” و “آلتای” تورک آدی داشیدیقلاری اوچون ۶۸ گوندور کیملیک آلا بیلمیرلر
محکمه حؤکمو چیخاریلماسینا باخمایاراق، اورمیه قئیدیات ایدارهسی بیر عائلهنین “ایلکای” و “آلتای” آدلی تورک اکیزلرینه کیملیک وئرمکدن ۶۸ گوندور ایمتینا ائدیر و بو، عائلهیه جدی پروبلئملر یارادیب. حالبوکی، داها اؤنجه بو آدلارلا بیر چوخ شخصه کیملیک کارتی وئریلیب.
بالامین آدی کامپانییاسی بو کؤرپهلرین آتاسی امیر حاجیحسنییه استنادا بیلدیریب: “اکیزلریمیز ۳۰ اردیبهشت ۱۴۰۴-ده دونیایا گلدی و بیز اونلار اوچون تورکجه ‘ایلکای’ و ‘آلتای’ آدلارینی سئچدیک. اورمیه قئیدیات ایدارهسی دئدی کی، ‘آلتای’ آدی قئیدیاتا آلینیر، آما ‘ایلکای’ تهرانین امری ایله سیستمده بلوکلانیب و قئیدیاتا دوشمور. اکیزلر اوچون یالنیز بیر ایزلهمه کودو وئریلدیگی اوچون، یالنیز بیری اوچون کیملیک وثیقهسی آلماق مومکون دئییل. گرک ایکینجی اوشاغین آدی دا تصدیقلنسین کی، هر ایکیسینه عینی واختدا کیملیک وئریلسین.”
اونون سؤزلرینه گؤره، عائله بو حوقوقونو آلماق اوچون محکمهیه باشووروب و ۲۲ تیر تاریخینده اورمیه صولح محکمهسینین ایکینجی شؤبهسی قئیدیات ایدارهسینی محکوم ائدیب و “ایلکای” آدی ایله کیملیک وئرمهیه مجبور ائدیب. محکمه حؤکمونده قئید اولونوب: “قئیدیات قانونونون ۲۰-جی مادهسینین ۲-جی بندینه اساساً، قئیدیات ایدارهسی یالنیز قاداغان اولونموش آدلاری بللی ائده بیلر و بو آدلاردان باشقا، هر بیر شخص اؤولادی اوچون ایستهدیگی آدی سئچمکده آزاددیر. آما بو ایداره قانونو پوزاراق یالنیز سیستمده اولان آدلاری قبول ائدیر.”
بونا باخمایاراق، حؤکمون چیخماسیندان ۱۴ گون کئچسه ده، اورمیه قئیدیات ایدارهسی هله ده اکیزلره کیملیک وئرمکدن ایمتینا ائدیر.
او آرتیریب: “بو سوروندورمهچیلیک بیزه چوخ باها باشا گلیب. اوچ آیدیر اوشاقلارین سودونو پول ایله آلیریق، سیغورتا یوخدور، موعالیجه خرجلرینی اؤزوموز اؤدهییریک. اوشاقلارین کیملیک اولمادان قالماسی بیزی جدی روحی تضییق آلتینا سالیب.”
#اوشاق_حوقوقلاری #تورک_آدلار
