تورک کؤرپه هایال ایکی آیدان آرتیقدیر کیملیک آلا بیلمیر
تبریزین قئیدیات ایدارهسی، «هایال» آدینی داشییان بیر تورک کؤرپهیه کیملیک وثیقهسی وئرمکدن ایمتینا ائدیب و بو سببدن او، ۶۸ گوندور کملیک آلا بیلمیر.
کؤرپهنین آناسی خانیم مینا صفوی، بالامین آدی کامپانییاسینا وئردیگی آچیقلامادا دئییب: “قیزیمیز ۱۴ اردیبهشت ۱۴۰۴-ده دونیایا گلدی و آدینی هایال قویدوق. بو آد تورکجهدیر و خیال، آرزو معناسیندادیر. تبریزدهکی قئیدیات ایدارهسینین یئتکیلیلری دئدیلر کی، بو آد سیستمده اولمادیغی اوچون کیملیک وثیقهسی وئره بیلمریک.”
بو آنا آرتیریب: “دئدیک کی، بو آد قاداغان اولونموش آدلار لیستینده یوخدور، پیس معناسی دا یوخدور و اوشاغیمیزا آد قویماق بیزیم طبیعی حاقیمیزدیر. آما قبول ائتمهدیلر. مجبور اولوب بو قرارا قارشی محکمهیه باش ووردوق، آما حاکم ده بیزه قارشی حؤکم وئردی و دئدی کی، تورکیه منشألی آدلار بیزیم قیرمیزی خطیمیزدیر. ایندی تئمییز محکمهسینین کئچیریلمهسینی گؤزلهییریک.”
مینا صفوی، سوندا بئله دئییب: “بیر آنا کیمی بو آدی اوشاغیما سئوگی و اومیدله سئچدیم. دوققوز آی قارنیمدا اونا ‘هایال’ دئیه سسلندیم. ایندی ده او، منیم اوچون هایالدیر.”
ایرانین وطنداشلیق قئیدیاتی تشکیلاتی تصدیقلنمیش آدلارینین لیستینی یاییملایاراق وطنداشلاردان بو آدلاری اوشاقلاری اوچون سئچمهلرینی ایستهییر. والیدئینلر طرفیندن سئچیلن آد قئیدیات ایدارهسی طرفیندن تکلیف اولونان لیستدن کناردا اولدوقدا، سئچیلمیش آد آراشدیریلماق اوچون بو تشکیلاتین (آد کومیتهسینین) ایداره هئیتینه گؤندریلهجک و تصدیق ائدیلمهدیگی تقدیرده آدین سئچیلمهسینه ایجازه وئریلمهیهجک.
تصدیقلنمیش آدلار لیستینده سیاسی و دینی محدودیتلر و فیکیرلر، بیر چوخ وطنداشی اینسان حوقوقلارینا ضد اولاراق، اوشاقلارینا دینی، ائتنیک و یا مدنی کیملیکلرینه گؤره آد وئرمکدن محروم ائدیر.
#تورک_آدلار #اوشاق_حوقوقلاری
