ایکی هفته‌دیر بوتون آذربایجاندا میللتین شادلیغی، مثبت هیجانی و میللی غورورونا شاهید اولموشوق.
تاریخ بویو تاپدالانیب، تحقیر اولونوب، اؤزگوونینی ایتیریب، باشینی دیک توتوب من تورکم دییه بیلمه‌ییب، اوشاغینی بیله فارسجا دانیشدیران میللت، ایندی فرقلی تریبونلاردا، مختلف آلانلاردا و چئشیدلی اورتاملاردا تورک اولدوغونو بیلدیرمک اوچون جومله‌لر قورور.
اؤزومو تانیدیغیمدان یوخ، هویتیمه تاخیلدیغیمدان یادیما گلن، تورکلر تحقیر اولونوبلار، اعتیراض ائدیبلر و سونوندا بیریسی دوروب باش آلداتماق اوچون دئییب: آذربایجان سر ایران است.
بو گونلر میللی غورورونان بیرلشن، قادینلارین آییقلیق و جسارت‌له شانلیق اورتاملاریندا اولماقلاری منیم اوچون بیر قادین اولاراق داها اؤنم داشییر. هویتیمی تانیماغا باشلادیغیمدان تورکلرین تاپدالانماقلاری قدر، قادینلارین دا تاپدالانماقلارینا شاهید اولموشام. آنجاق تاسوفله قادینلارین اعتراض سسلری گوجسوز اولوب و سونوندا بیر نفر تاپیلیب باش آلداتماق اوچون دئییب: بهشت زیر پای مادران است. زن‌ها فرشته‌اند. مادران مقدس‌اند و آذربایجان قیزلاری گؤیلرین اولدوزلاری!
تیراختورچولار ایراندا قادین حاقلارینی شعارلاریندا یئرلشدیرن ایلک تیم اولسالاردا، آذربایجان قیزلاری گؤیلرین اولدوزلاری، آذربایجان سر ایران است قدر آلداتیجی سؤز دور.
بو گون ایلک دفعه اولاراق سهند استادیومونا گئتدییمده، یوللاردا قادینلارین ساییسی‌نین نه‌قدر چوخ اولماسینا شاشیرمیشدیم. آنجاق قادینلارا آیریلان سککیلر اوقدر آز و تحقیر ائدیجی‌ایدیر کی گرچکدن اوره‌ییم آغریدی. قادینلار یئرلرین آز اولماسینا اعتیراض ائتدیکلرینده، عصیان ائدیب باغیردیم: گؤیلرین اولدوزلاری قالدیغینیز گونه قدر یئر اوزونده برابر حاق آلا بیلمیه‌جکسیز. برابر حاق ایسته‌ییریکسه، برابر دیرنیب، برابر چالیشیب برابر یاشام حاققی آلمالییق. اؤنومده دوران پلیس بئله جوابلادی:« آخی بوردا نه وار؟ نه حاققی؟ گئدین ائویزه قشح شام پیشیرین، گئجه ده کیشیلر بوردان یورغون گلنده دیلخوشلوغونان یین. توپا باخماقدان حاق چیخار؟»
سونوندا منیم اوچون ان گؤزل اولای، قادینلارلا ائرککلرین ال-اله، قول-قولا و چیین-چیینه اورتاق سککیلرده اوتورماقلاری اولدو. سون ساعاتلاردا داها جینسی تفکیک ایشه یارامادی و قادینلارلا ائرککلر بیرلیکده ان امنیتلی، ان حضورلو و ان حاشیه‌سیز سککیلرین یارادیجیسی اولدولار. بو گؤزل اولای موبارکیمیز اولسون.
قایناق: م. شخصی صفحه سی
