کرج‌ده بیر اوخول‌دا نظارتچی (ناظم) اولاراق چالیشان قادین، ۱۰ اردیبهشت چارشنبه گونو حیات یولداشی‌نین اسید هوجومونا معروض قالاراق اوز بؤلگه‌سیندن آغیر شکیلده یارالانیب.
ایلکین بیلگیلره گؤره، بو حادثه ضررچکنین ایشله‌دیگی اوخولون باغچا آلانیندا باش وئریب و هوجوم ائدن شخص اونون حیات یولداشی ایدی. سؤزلو موباحیثه‌دن سونرا ارکک قادینینن اوزرینه اسید آتیب. رکنا خبر سایتی بو حادثه‌‌‌نین موتیوی‌نین “عائله‌‌‌داخیلی موناقیشه‌لر” اولدوغونو بیلدیریب.
جینایتی تؤره‌دن شخص ایفاده‌سینده بیلدیریب: “بیر مدتدیر اونون داورانیشلاریندان شوبهه‌له‌نیردیم. حادثه گونو منیمله موباحیثه ائتدی و ائودن چیخدی. بو مسئله منی آنی قرار وئرمه‌یه وادار ائتدی.”
او آرتیریب کی، حادثه گونونده اسید الده ائتدیکدن سونرا حیات یولداشینی اوخولا قدر ایزله‌ییب و اوخول باغچاسیندا قادینین اوزرینه اسید آتاراق، اونون دئدیگینه گؤره، “جزا وئرمک ایسته‌ییب.”
درحال گؤرولن حوقوقی تدبیرلرله تقصیرلندیریلن شخصین ائوینه داخیل اولماق اوچون قرار چیخاریلیب و پولیس امکداشلاری اونو قاچماق اوچون اشیالارینی ییغارکن یاخالاییب. حاضردا تقصیرلندیریلن شخص نظارتده‌دیر.
عینی زاماندا، جمهورباشقانی‌نین قادین ایشلری اوزره معاونی بیلدیریب کی، “زوراکیلیغین قارشیسینی آلماغا دایر قانون لاییحه‌‌سی آرتیق قاباقلاییجی تأثیره مالیک دئییل”. قادینلاری ساوونمالی اولان بو لاییحه ۱۵ ایل موختلیف قوروملار آراسیندا سوروندورمه‌چیلیکدن سونرا مجلیسین گونده‌میندن چیخاریلیب و ایندی بیر چوخلاری اونون معناسیز و ائتکیسیز اولدوغونو دوشونور. قارشیسی آلینمایان زوراکیلیقلار جاوابسیز قالیر و توپلومون دستک طلب ائدن سسی جاوابسیز قالیر.
#ایران_خبرلری #قادین_حوقوقلاری
