بهایی وطنداش شادی شهیدزاده نین ۵ ایللیک حبس جزاسی تصدیق ائدیلیب
تهران تئمییز محکمهسینین ۳۶-جی شؤبهسی ائوین حبسخاناسیندا حبسده اولان بهایی وطنداش شادی شهیدزادهنین ایلکین ۵ ایللیک حبس جزاسینی تصدیقلهییب.
شادی شهیدزاده و داها اوچ بهایی وطنداشین محکمهسی ۱۰ خرداد ۱۴۰۲-ده تهران اینقیلاب محکمهسینین ۲۶ سایلی شؤبهسینده حاکم افشارینین باشقانلیغی ایله کئچیریلدی. حؤکمه اساساً، شادی شهیدزاده اؤلکهنین گوونلیگینی پوزماق مقصدی ایله قئیری-قانونی قروپ و دستهلره عضو اولماق اتهامی ایله ۵ ایل حبسه محکوم ائدیلیب.
سؤزوگئدن اتهامین معناسی شادی شهیدزادهنین ایرانین بهایی ایجماسینا عضو اولماسی، باشقا سؤزله دئسک، بهایی اولماسی دیر.
یئنی ایلین باشیندان بهشت زهرا هئچ بیر رسمی سند اولمادان وفات ائتمیش بهاییلرین جنازهلرینی تهرانین بهایی قبیریستانلیغیندا دفن اولونماق اوچون عائلهلرینه بوراخماقدان ایمتینا ائدیب. بونا اساسلاناراق، بهشت زهرا یئتکیلیلری بیر سیرا مرحوم بهاییلری عائلهسینه خبر وئرمهدن و دینی مراسیملر ایجرا ائتمهدن خاواران قبیریستانلیغیندا دفن ائدیبلر.
اؤلنلردن بیری شادی شهیدزادهنین ننهسیدیر. بو بهایی وطنداش پروبلئمی حل ائتمک و ننهسینین میتینی تحویل آلماق اوچون موختلیف اورقانلارا موراجعت ائدرکن، بازار ائرتهسی، ۱۱ اردیبهشت گونو اطلاعات ناظرلیگینین امکداشلاری طرفیندن حبس ائدیلهرک ۲۰۹-جو بنده آپاریلیب.
شادی شهیدزاده ۵ آیدان چوخدور اوین حبسخاناسیندادیر.
اونون بئش یاشلی بیر اوشاغی وار.
#دینی_آزلیقلار #بهایی
