اورمیه بیلیمیوردونون اؤیرنجیسی نرگس فداکارین ائیتیمدن محروم قالماسی داوام ائدیر
ایرانوایره گلن خبرلره گؤره اورمیه بیلیمیوردونون اقتصاديات فاکولتهسینه ۱۳۹۸-ده گیریشی اولان لیسانس اؤیرنجیسی نرگس فداکارین ائیتیمینی داوام ائتدیرمهسی و بیلیمیوردونا گیریشی هله ده رد ائدیلیر.
اورمیه بیلیمیوردونون بو اؤیرنجیسی بیر ایله یاخیندیر کی، قئیری-قانونی اولاراق ائیتیم آلماسی و بیلیمیوردونا گیریشی قاداغان ائدیلیب و ایندییهدک بو اؤیرنجی ایله باغلی اینتیظام کومیتهسی طرفیندن هئچ بیر قرار وئریلمهییب.
اؤلکهنین اؤیرنجیلر بیرلیگینین راپورونا گؤره، اورمیه بیلیمیوردونون گوونلیک رئیسی ۷ آبان ۱۴۰۱-جی ایلده خانیم فداکارین اؤیرنجی کیملیگینی گؤتوروب و بو تاریخدن بو اؤیرنجینین بیلیمیوردونا گیریشی قاداغان ائدیلیب و بیلیمیوردونا وب اوزریندن گیریش سیستمی اونون اوچون کئچن ایل ۱۰ آباندان بری باغلانیب.
بیر مدت اؤنجه بیلیمیوردونون اینتیظام کومیتهسی بو اؤیرنجییه شیفاهی اولاراق بیلدیرمیشدی کی، تکلیف اولونان ۴ دؤنم ائیتیمدن اوزاقلاشدیرما قراری ناظرلیگین مرکزی کومیتهسینه گؤندریلیب.