«ذکیه ذولفقاری» چیلله خاطیره‌سی

گون باتماقدادی، ائشیک‌ده یئلین کوفولتوسو اورک سیخینتیسی گتیریر، بو نه تهه‌ر داریخماقدی ایلاهی اوتوروب باشیمی موبلا دایاییب گؤزلریمی یومورام، خیالیم قانات چالیب کئچمیشلرده آتا-بابا کندیمیز شرفه‌یه سفر بی اولور.
آنام شهردن گلمیش ایکی اوچ آیین گلینی، ایلک چیلله گئجه سینی نین هیجانیندادیر، آتام ایسه آتلانیب اوشتوبونه نار گتیرمگه گئدیبدیر، آنام یالواریب بوگون هاوا یاخشی دییل گئتمه، نارسیز دا چیلله اولار…
آتام زارافاتجا دئییب:
اولماز خانیم اولماز، سو گلیب نوا دولماز، قارسیز چیلله اولسا دا، نارسیز چیلله اولماز. و گئدیر.
گینه قارسیزیئل، شیددتله اَسیر و منیم خیالیم اوچماقدادیر.
آنام لا بؤیوک آنامین جانینا قورخو دوشور،هاوا چوخدان قارالیب آز قالا گئجه یاری اولور. چوخ گئجدی آنام دئییر، دوروب قوهوم قونشویا خبر ائلییه‌ک. قوهوملاردان نئچه‌سی بیر مئتره یاخین قاری سؤکه-سؤکه گلیب کورسو باشینا یغیشیرلار، قار شیدتلی کولکله، قاپ باجایا چیرپیر، کورسونون اوتو بیتمکده دیر، کیمسه کورسونون آلتینا اوت قویماق فیکرینده دئییل، هامینین بوغازی قورویوب نیاران گؤزلر بیر بیرینه باخیر. بؤیوک آنامین گؤز یاشی یاشماغینی ایسلادیر.
بوغازیم قورویوب، بیلمیرم اورک سیخینتی دان دیر یوخسا خیال قوشومون خاطیرلادیغی چیلله خاطیره سیندن! گؤزومو آچیب دیکلنیریم، میز اوستونده کی چایدان بیر قورتوم ایچیرم. طوفان پنجره لری سیلکه‌ییر. اؤز قلبیمده دئییرم دا، بو طوفان قار نیشانه سیدی.
آنام تندیردن چاینیکی بیر ایکی استکانلا گتیریب قویور کورسونون اوستونه، قندی اونودور. یاشماقسیر اوزوندن دوداقلاری‌نین تیتره‌یشینی هامی گؤرور… قندسیز ده کیمسه نین چای ایچمک هوسی یوخدور. کندین آغ ساققالی استکانی گؤتوروب بیر باشا باشینا چکیر. آنجاق، چای سویوقدی دئمیر. بیردن قاپیدا آت کیشنه‌مسینی ائشیدیرلر، هامی درهول آیاغا قالخیب قاچیرلار. بؤیوک آنامین شلته‌سی یئرده نسه‌یه ایلیشیر، اوزو اوسته ییخیلیر، آنجاق تئز آیاغا قالخیب حیط قاپیسینا ساری قاچیر.
آیفون وورولور! بودا وورولماغا واخت تاپدی. آیاغا دوراندا اَلیم دئییر میز اوسته‌کی استکان آشیر. آنام دئیه‌ردی: سنده بؤیوک آناوا چکمیسن اردمسیز، ال -آیاقسیزسان. کیمسه یوخودو، بیر اوشاق ووروب قاچیب دئمک.
آتامین آتی تک باشینا یهه‌رسیز، لوت -پوت قاپیدا جوت آیاقلارین گؤیه قالدیریب، اؤزل بیر شکیلده کیشنیرمیش. بو حالی گؤرن آناملا بؤیوک آنام ایکی اَللی باشلارینا چیرچیب قیشقیرا- قیشقیرا ییخیلیب هوشدان گئدیرلر.
آتی یهرلیب بیر نئچه آتلی ایلا بیرگه عمیلریم کندی اوز یوخاری یولا دوشورلر. اوشتوبونه گئدن یولو توتوب دره لری آختارا آختارا گئدیرلر، اوشتوبونه یئتیشمه‌میش آتامین آتی، دره لرین بیری‌نین قیراغیندا دایانیب یئنه او حالتده کیشنه‌ییر. هامی آتدان دوشوب دره‌یه طرف آخینیرلار…هره بیر طرفدن اللرینده کی آراجلارلا قاری اویان بویان ائلیرلر، نهایت آتامی قار آلتیندان یاری جان چیخاردیرلار…
جانیما سویوق تر اوتوردو، آخ … او گون آتام قار آلتیندا قالیب دونسایدی…اؤزومه توخناخلیق وئریب دوشوندوم، اوندا من بو دونیادا یوخودوم کی، آتاسیزلیق حیسلری یاشایام…
آتام هاندان گئجدن اؤزونه گلندن سونرا، آناما اوز توتوب دئمیشدی: سنه اوشتوبون نارینین قولون وئرمیشدیم، سؤزومو توتانمادیم، چیلله‌میز نارسیز اولاجاق، منی باغیشلا.
یقین آنام بئله دئمیش: اولسون آدیش، گلن ایل اوغلوموز گئدیب سن گتیرن نارلاری قارین آلتیندان تاپار…
منده دئییرم:
اولماز خانیم اولماز سو گلیب نوا دولماز نارسیز چیلله اولسا دا، واللاه قارسیز چیلله اولماز.

دیدگاهی بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آحرین مطالب