تورک نننیلرینین(لالایی) یارادیجیسی قشقایی ائلیندن ” پروین بهمنی دونیاسینی دئیشدیردی

پروین بهمنی ۱۳۲۸جی شمسی ایلینده شیرازدا قشقایی تورک بیر عائیله ده دونیایا گلدی. اوز دئییشینه گوره اوشاقلیقدان بری ائولری موسیقی، صنعت و شعر مرکزی اولاراق تانینیرمیش و باباسی بویوک شعر، ادب و موسیقی اوستادلاریلا صورکلی گئت گلده ایمیش . اونا گوره اوشاقلیقیندا اوز تای توشلاریلا اویناماق یئرینه ، دقت و ماراغینی شعر و موسیقیه وئرمیشدیر .
تانینمیش موسیقی آراشدیرماجی محمدرضا درویشی، پروین خانیم حاقدا دئییرکی : ” صون ۳۰ ایل ایچینده پروین خانیم قدر، تورک موسیقی صعنتی حاقدا آراشدیرما یاپان کیمسه اولمویوبدور .آیریجا پروین خانیم دیگر قشقایی تورک موسیقیچی لرینین یولونو آچاراق دونیا سویه سینده تانیمالارینا سبب اولموشدور .
اصلینده قشقایی تورک ائلینین یاشام طرزلری موسیقی و شعرله ایچ ایچه دیر و رحمتلیک پروین خانیم بو باره ده دییردی کی :” قشقاییلر موسیقی اولمادان، چورک بیله یییممزلر هر بیر قشقایی تورکو، موسیقی صنعتینی اویرنمک ایسترسه، معلیمه احتیاجی یوخدور. چونکو هر قشقایی هم اوخویور و هم چالیر و سونوج اولاراق قشقایی لرین یاشام طرزلری موسیقی ایله دویونلنیبدیر “.
پروین خانیم بهمنی موسیقی ساحه سینده اولان بوتون استعدادلارینا رغما گینه بویوک اوستادلاردان آواز درسلری آلدی و ایکی ایل ایتالیادا یاشادی . ایتالیادان دوندوکدن صونرا ۱۳۷۲جی شمسی ایلینده اوز عهده سینده اولان قشقایی موزیک قوروپو ایله “آواز آیناسی” فستیوالیندا شرکت ائله دی . صونرادا ۱۳۸۰جی ایلده “حاووا” آدیندا بیر موسیقی قوروپو اولوشدوردو کی هنری چالیشمالاریندا یئنی بیر باشلانقیج ساییلیردی.
۱۳۸۶. جی ایلده ” اوچ قادین” فیلمینده ننی اوخویاراق اوز شهرتینین اوجونا یئتیشدی .
وورقولاماق لازیم کی پروین بهمنی سس صنعتچیسی اولماقلا بیرگه شاعیر، یازار و چئویرمن ایدی . اونون قلمیندن چیخان اثرلردن: “اصلی و کرم منظوم دستانی” ، “قشقایی صنعتچی لرینین یاشاملاری” مشهور قشقایی قادینلاری” و آشیقلار موسیقی سی” کیتابلاریندان آد آپارماق اولار .
بو بویوک تورک شاعیر، یازار و موسیقیچی، عینی زاماندا فولکلور آلانیندا دا بیر چوخ کیتابین نشر اولماسیندا، اونملی بیر رولو اولموشدور : “تورک خالقینا عائید دستانلار، افسانه لر و ناغیلار ” مونوگرافیا باخیمیندان ایران تورکلرینین آشیقلاری” و ” ایران تورکلری”، بو کیتابلاردان ساییلیر. موسیقی ساحه سینده پروین خانیما عائید اولان “قشقایی نغمه لری” ، ” غریب تانریم” و “فرودون یادینا” آلبوملردیر .
اونودماماق گره کیرکی : پروین بهمنی، تحصیلاتینی، شیرازین دانشسراسیندا تربیت معلم بولومونده بیتیرمیشدی و ۱۶ ایل بویونجا قشقایی ائلیننین دانشسراسیندا درس وئرمکله مشغولدو . اونون موسیقی ، هنر و ادب ساحه سینده پارلاق گیریشی و تورک موسیقی سی حاقدا ائتدیگی آراشدیرمالا سایه سینده “تورک ننیلریننین آناسی” (لالایی) لقبیله تانیندی و ایرانین کولتور باخانلیقی طرفیندن فخری دکتری درجه سینه نائیل اولدو . روحو شاد یولو گئدرلی اولسون.

دیدگاهی بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آحرین مطالب