اریشته کسمک‌ و بیر امک نغمه‌سی

بو ویدئودا اریشته کسمگین مختلف مرحله‌لری (او جمله‌دن: خمیر آچماق، ریشته‌له‌مک، اریشته‌لری قوروتماق) گؤستریلیر.

اونون یانی‌سیرا بیر نفر ده ایشین چتینلیگی آزالیب، یونگونلشسین دییه بیر نغمه‌ اوخویور.
بیلدیگینیز کیمی امک نغمه‌لری ایش اثناسیندا اوخونار، مثلا سود ساغاندا، دویو دؤینده، پارچا یا خالی توخویاندا و ….
بو‌راداکی اوخونان نغمه بیر آنانین گلین گئدن قیزینا وئردیگی نصیحت‌لری و قیزین دا آناسینا دانیشدیغی گلایه‌لری و اورک سؤزلرینی احتوا ائدیر.

آنا:
میسگردن آللام چاناغی،
[گلین] ایچینه تؤکرم شانی.
سؤز آپاریب، سؤز گتیرمه
[گلین] سن او‌ل قارداشیوین جانی.

اوتاق قاپین قیفیل‌لاما!
[گلین] گئدیب اوتاقدا یوخلاما!
بالدیزلارین بیر سؤز دئسه
[گلین] ییغیب، آخشاما ساخلاما!

چادیراوی قول ائیله‌مه!
[گلین] دده‌ن اؤوون یول ائیله‌مه!
آغیر ائلین سن قیزی‌یان،
[گلین] گؤزله اؤزون خوار ائیله‌مه!

قیز:
چادیرامین باشی شالدی،
[ننه] حئییف اولدو بولار آلدی.
اؤز گؤیلوم بوردا یوخودو
[ننه] قسمت الهی‌ آپاردی

آنا:
اوجا دووار آشمییاسان،
[گلین] هر سؤزه باش قوشمویاسان.
بالدیزلارین بیر سؤز دئسه
[گلین] ایلان اولوب ساشمییاسان!

قیز:
چادیرامی آنام بیشدی،
[ننه] گول‌لری ترسییه دوشدی.
اوچ باجی‌یا پوشک آتمیشدیق
[ننه] غریب‌لیگی منه دوشدی.

حئیتدری اوزون دره،
[ننه] کیلیدیم دوشوب ال‌لره.
باعیثین بالاسی اؤلسون
[ننه] منی سالیبدی چؤل‌لره.
———
ایضاحات:
الف: بو ویدئونون هانسی بؤلگه‌دن چکیلدیگی حاقدا دقیق معلومات الده ائده بیلمه دیم، آنجاق اوخویان خانیمی شیوه‌سی زنجان بؤلگه‌سینه و اونون اطراف یئرلرینه اوخشارلیغی وار.
ب: بو ویدئونو منه گؤندرن و نغمه‌نین قرائتینده یاردیمجی اولان گنج و عالم دوستوم سید مرتضی حسینی‌ دیر، بو وسیله‌یله منتدارلیغیمی بیلدیریرم.

لغتلر و ترمینلر
چادیرانی قول ائله‌مک: بیر نوع چادیرا اؤرتمک طرزی، چادرانین بیر طرفین او بیر طرفده‌کی چیگینه سالیب بیر قولونو چادرادان ائشیکده ساخلاماق، بؤیوکلرین قارشیسیندا بئله چادیرا اؤرتمک سایمامازلیق کیمی آلینان و یاخشی ساییلماز.
اؤون: ائوین
قیزی‌یان: قیزیسان
ساشمییاسان: سانجمایاسان
بیشدی: بیچدی
ترسییه: ترسه‌یه
حئیتدری: حیتلری {فا. حیاطشان}

دیدگاهی بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آحرین مطالب