قهرمان خانیم؛ خاور قهرمانی ستارخان نوه سیم

قهرمان خانیم؛ خاور قهرمانی
«اوشاقلیق ایللریمی گونئی آذربایجانین ان‌گؤزل دلبر گوشه‌لریندن بیری اولان قاراداغ ماحالیندا کئچیرمیشم. ایلک کؤورک قدملریم گؤزل قاراداغین الوان چیچکلی چمنلرینده، قارتال دیمدیکلی قایالاریندا، بارلی- بهرلی باغلاریندا، قوینو قالین مئشه‌لی، زیروه‌لی داغلاریندا، آینا کیمی پارلاق یارپیز عطیرلی بوز بولاقلاریندا برکییب» دئین خاورخانیم قهرمانی حقیقتن آدینا یاراشان بیر قهرمان ایدی.
خاورین یاشاییش یئری آسلاندوز ایدی. اونون گنجلیک گونلرینده دموکرات فرقه‌سینین گونشی پارلاییب یوردوموزو ایشیقلاندیردی. خاورخانیم بیر چوخ آزاده اینسانلار کیمی دموکرات فرقه‌سینین تبلیغچی‌سی کیمی کندلری اوبالاری دولاشیب، شعر قوشوب خالقیمیزی معاریفلندیردی. اونون ان‌شیرین خاطیره‌لی گونلری آسلاندوز، اهر، کلیبر، ارؤشه، قالاکندی، قالالی، سوره‌جر، موتاللی و قاراداغین آیری- آیری یئرلرینده کئچدی. کئشگه بیز ده او گونلری یادا اونا بنزر گونلری گؤرردیک کئشگه.
سونرا شاه رئژیمی بیرداها آذربایجانا قاییتدی و خاورخانیم دا بیر چوخلاری کیمی باکی شهرینه قاچماغا مجبور اولوب قالان عؤمرونو وطن حسرتینده سیزلادی. اونون «ستارخان نوه‌سی‌یم» عنوانلی شعر کیتابیندا بیر شعر :

توخونما اینجی‌ین سینیق کؤنلومه
یاناغیندان کوسموش یولاق کیمی‌یم
سنین فراقیندان، سنین غمیندن
تیتره‌ین دیل کیمی، دوداق کیمی‌یم.
جسارت گؤستریب، ائتسه‌ده عیناد
منزیله چاتماییر هر قارتال قاناد
عشقیمی وعده‌سیز سولدوردو حایات
غنچه‌سی سولموش بیر بوداق کیمی‌یم.
هنر تکان وئرر عقله، کمالا
عصمت شعله ساچار حوسنه، جمالا
طالع منی سالیب هامیدان دالا
یول اوسته، تک بیتمیش قوواق کیمی‌یم.
جلادین کسدیگی قانان‌باش اولوب
اورکلر آغلاییب، گؤزلر یاش اولوب
گلمه‌لر یوردومدا وطنداش اولوب
من اؤز وطنیمده قوناق کیمی‌یم
من اؤز وطنیمده قوناق کیمی‌یم.

قایناق : ابراهیم ساوالان، فیس بوک صحیفه سی.

دیدگاهی بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آحرین مطالب