نازنین زاغری ۴۰۰ میلیون پوند قارشیلیغیندا سربست بوراخیلاجاق

ایران خبر شبکه‌سی بیلگیلی بیر قایناغا دایاناراق ایران-بریتانیا وطنداشی نازنین زاغری‌نین ۴۰۰ میلیون پوند قارشیلیغیندا سربست بوراخیلاجاغینی ادعا ائتدی.

قرارین وین دانیشیقلاری‌نین اوچونجو مرحله‌‌‌سینده ایران و ۴ + ۱ اؤلکلری آراسیندا الده ائدیلمیش بیر سیرا راضیلاشمالارین بیر حیصه‌‌‌سی اولدوغو گؤرونور.

ایران ایسلام جمهوریییتی‌نین وین‌ده‌کی دانیشیقلار قروپونون مسوولو عباس عراقچی دونن، ۱۱ اردیبهشت ۱۴۰۰-جو ایل تاریخینده سؤز قونوسو تحریملرین بیر حیصه‌‌‌سی‌نین لغوی و فردلرین تحریمی مؤوضوسوندا دانیشیقلارین داوام ائتدیریلمه‌سی باره‌ده راضیلیغین الده ائدیلدیگینی اعلان ائتدی. بعضی بؤلوملرین یازیلماسی و راضیلاشمانین “یاواش، لاکین ایره‌لییه دوغرو” اولدوغونو دئدی.

ایسلام جمهوریییتینه یاخین اولان لبنان شبکه‌سی المیادین ده ایراندا حبسده اولان دؤرد آمریکا وطنداشی‌نین تئزلیکله سربست بوراخیلاجاغینی و آمریکانین یئددی میلیارد دلار بلوکلانمیش ایران پولونو و دؤرد ایران وطنداشینی سربست بوراخاجاغینی ادعا ائتدی.

بوندان اؤنجه، ۱۳۹۸-جی ایلین مهر آییندا ایران خاریجی ایشلر ناظری محمدجواد ظریف، او زامانکی بریتانیا خاریجی ایشلر ناظرینه نازنین زاغری‌نین سربست بوراخیلماسی قارشیلیغیندا چیفتن تانکلاردان اولان بورجلارین یئرینه تانکلارین آلینماسینی تکلیف ائتدیگینی سؤیله‌دی.

او واسطه‌‌‌چی اولماغا حاضر اولدوغونو سؤیله‌دی، لاکین جرمی هانت بونو “شانتاژ” اولاراق اعلان ائتدی.

ایران-بریتانیا وطنداشی نازنین زاغری، ۱۹ فروردین ۱۳۹۵-ده کیچیک اؤولادی ایله ایراندان بریتانییایا قاییدارکن هاوا لیمانیندا توتولدو.

جاسوسلوق اتهامی ایله بئش ایللیک حبس جزاسی چکدیکدن سونرا ۱۷ اسفند ۱۳۹۹ بازار گونو سربست بوراخیلدی، لاکین بو یاخینلاردا تهراندا آچیلان یئنی بیر پرونده‌یه گؤره بیر ایل حبس جزاسینا محکوم ائدیلدی.

خانیم زاغری‌نین حیات یولداشی ریچارد رتکلیف ده اینقیلاب محکمه‌‌سی‌نین “رژیمه قارشی تبلیغات” اتهامی ایله حبسدن اؤنجه بیر ایل ده اؤلکه‌نی ترک ائتمه‌سینی قاداغان ائتدیگینی سؤیله‌دی.

یئنی حؤکمه بریتانیا حؤکومت رسمیلری طرفیندن اعتراض ائدیلدی، بریتانیا باش ناظری بوریس جانسون، خانیم زاغری‌نین حبس‌خانادا اولمامالی اولدوغونو و و ایراندا حبسده اولان دیگر ایکیلی وطنداشلارین سربست بوراخیلماسی اوچون الیندن گلنی ائده‌جه‌یینی سؤیله‌دی.

بریتانیا مقاملاری نازنین زاغری‌یه قارشی یئنی جزانی “قئیری اینسانی” و “عدالتسیز” آدلاندیردیلار و خانیم زاغری‌نین حبسده ساخلانماسینا اعتراض ائتدیلر.

iranwire

دیدگاهی بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آحرین مطالب