تهران بیلیم‌یوردونون اؤیرنجیسی سها مرتضایی ۶ ایل حبس جزاسینا محکوم ائدیلدی

اؤلکه‌نین اؤیرنجی بیرلیگی شوراسی‌نین تلگرام کانالی، سیاسی بیلیملر دوکتورا درجه‌‌‌سی آدایی و تهران بیلیم‌یوردو اؤیرنجی بیرلیگی شوراسی‌نین کئچمیش کاتیبی سها مرتضایی اوچون ۶ ایل حبس جزاسی وئریلدیگینی اعلان ائتدی.

ائیتیمدن منع ائدیلن بو اؤیرنجی اعتراض آکسییالارینا قاتیلدیغی اوچون “تبانی ائده‌رک میلی گوونلییه قارشی حرکت ائتمک” اتهامی ایله 6 ایل حبس جزاسینا محکوم ائدیلدی.

بو اؤیرنجی فعالی‌نین پرونده‌سینه تهران اینقیلاب محکمه‌‌سی‌نین ۱۵-جی شؤبه‌سینده حاکم صلواتی‌نین باشقانلیغی ایله باخیلدی. خانیم مرتضایی‌نین وکیلی مصطفی نیلی‌نین دئدیگینه گؤره “ائیتیمدن منع ائدیلدیگینه  اعتراض اولاراق تهران بیلیم‌یوردونداکی اوتورورما ائیلمی کئچیرمک، کئچن ایل آبان آییندا تهران بیلیم‌یوردونداکی اعتراضلار و اؤیرنجی بیرلیگی شوراسینداکی فعالیتلر” اونا قارشی ایره‌لی سورولن اتهاملار آراسیندادیر.

سها مرتضایی‌یه ۱۳۹۸-جی ایلین آبان آییندا کئچیریلمیش عوموم‌میللی اعتراض آکسییالاری زامانی بیر مئساژ گؤندریله‌رک تهران بیلیم‌یوردو فاطمیه یاتاق‌خاناسی‌نین گیریشینه چاغریلدی و یاتاق‌خانانین اؤنونده توتولاراق ائوین حبس‌خاناسینداکی اینقیلاب کئشیکچیلری‌نین اطلاعات تجرید‌خاناسینا کؤچورولدو.

خانیم مرتضایی، محکمه‌‌نین سونونا قدر ۲ بهمن ۱۳۹۸-جی ایلده ۵۰۰ میلیون تومن گیروو موقابیلینده ورامین‌ده‌کی قرچک حبس‌خاناسیندان مووقتی اولاراق سربست بوراخیلدی.

کئچن ایل مرتضایی، سیاسی بیلملر ساحه‌‌‌سینده‌کی دوکتورایا قبول ایمتاهانیندا ۱۰-جو سیرادا یئر آلمیش، آنجاق پرونده‌سینده‌کی اسکیکلیک سببییله ائیتیمدن محروم ائدیلمیشدیر.

بو اؤیرنجی فعال ۱۳۹۸-جی ایل مهر آیینین سونوندان بری ائیتیمدن محروم اولماسینا اعتراض اولاراق تهران بیلیم‌یوردونون مرکزی کیتاب‌خاناسی‌نین قارشیسیندا تک کیشیلیک اوتورما ائیلمی کئچیرمیشدی.

سها مرتضایی اؤنجه‌لر ۱۳۹۶-جی ایل دی آیی اعتراضلاری ایله علاقه دار بیر پرونده‌ده بیر ایل حبس جزاسینا محکوم ائدیلمیشدی.

دیدگاهی بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آحرین مطالب