“رها قنبری”، قائمشهر شهریندن اولان ۷ یاشلی قیز اوشاغی کی، دئییلیر بئش آی مدتینده گیزلی شکیلده اؤگئی آناسی طرفیندن مئتادون شربتی ایله زهرله‌نیرمیش، اؤتن گئجه ۲۰ اردیبهشت ۱۴۰۴ تاریخینده ساری شهرینده‌کی بوعلی خسته‌خاناسیندا حیاتینی ایتیریب.
اینسان حاقلاری ساحه‌‌‌سینده فعالیت گؤسترن “هیرکانی” مئدیاسی‌نین یایدیغی بیلگیلره اساساً، بو اوشاق ۱۱ اردیبهشت جوما آخشامی گونو یوکسک دوزادا مئتادون قبول ائتدیکدن سونرا آغیر زهرلنمه کئچیریب و کوما وضعيتینده اؤزل باخیم شؤبه‌سینه یئر‌لشدیریلیب. بیلگیلره گؤره، رها بیین شیشمه‌سی، بیر نئچه دفعه اورک دایانماسی، ایچ قاناخما و جدی درجه‌‌‌ده شعور سويه‌‌سی‌نین ائنمه‌سی ایله قارشیلاشیب.
بو اوشاغین عائله‌‌‌سینه یاخین بیر قایناق داها اؤنجه “هرانا”یا دئمیشدی کی، رهانین زهرلنمه‌سی، سون آیلار ایچینده اؤگئی آناسی طرفیندن دفعه‌‌لرله مئتادون شربتی وئریلمه‌سی‌نین سونوجودور.
مؤوجود دلیللره باخمایاراق، بو قایناق دئمیشدی کی، رهانین آتاسی حیات یولداشینا قارشی شیکایت ایره‌لی سورمکدن ایمتینا ائدیب. بونونلا بئله، یئرلی راپورلاردا بو اوشاغین آتاسی و اؤگئی آناسینین حبس ائدیلدیگی بیلدیریلیر؛ باخمایاراق کی، رسمی قوروملار هله بو پرونده باره‌ده آچیقلاما وئرمه‌ییبلر.
رها، آناسینین اؤلوموندن سونرا آتاسی و اؤگئی آناسی ایله بیرگه یاشاییردی. ایلکین بیلگیلره گؤره، اونون بیر قارداشی دا وار.
ایران‌دا اوشاقلارین نارکوتیک ترکیبلی درمانلارلا، اؤزللیکله مئتادونلا تکرار زهرلنمه‌سی حاللاری داها اؤنجه ده موشاهیده اولونموشدور، لاکین رها قنبری‌نین حادثه‌‌‌سی اوزون مدت داوام ائتمه‌سی و قصداً اولماسی سببیندن سوسیال مئدیادا گئنیش تپکیلره سبب اولوب.
#اوشاق_حوقوقلاری #رها_قنبری
