ایران‌دا تخمیناً ۳۰۰ مین ارکک چوخ ائشلی‌دیر !
۱۴۰۱-جی ایلین رسمی ایستاتیستیکالارینا گؤره، اؤلکه‌ده قئیده آلینان ائو‌لیلیکلرین تخمیناً یوزده ۱.۵۰-سی چوخ ائشلی نیکاحلاری احاطه ائدیر. بو دا تخمیناً ۳۰۰ مین ایرانلی ارککین بیردن چوخ حیات یولداشینا صاحب اولماسی دئمکدیر.
ایرانین گنجلر و ایدمان ناظرلیگی‌نین معاونی علیرضا رحیمی‌یه گؤره، چوخ ائشلیلیک اساساً کیرمان، سیستان و بلوچیستان، گولوستان، کوردوستان و گونئی خوراسان کیمی بعضی ایالتلرده یاییلیب. لاکین بؤیوک شهرلرده و مدرن بؤلگه‌لرده بو گئدیشات گئنیش یاییلماییب.
او، بؤیوک شهرلرده “آغ نیکاح” (رسمی قئیدیاتا آلینمایان بیرلیکده یاشاما) قونوسونون آرتماسینا دا توخوناراق، بو باره‌ده دقیق ایستاتیستیک بیلگیلرین مؤوجود اولمادیغینی بیلدیریب.
عائله قورومونا باخیشین ديیشمه‌سی و اقتصادی چتینلیکلر، بعضی گنجلرین رسمی نیکاح یئرینه قئیری-رسمی بیرلیکده یاشاماغی سئچمه‌سینه سبب اولوب.
علیرضا رحیمی‌یه گؤره، سون ایللرده سوسیال مئدیادا چوخ ائشلیلیک تبلیغاتی آرتسا دا، بو، داها چوخ تجاری و گؤستری آماجلیدیر.
بو یئتکیلی‌یه گؤره، بعضی شخصلر بو مؤوضودان ایستیفاده ائده‌رک دقت چکمه‌یه، ایزلییجی توپلاماغا و حتی رئکلام یولو ایله پول قازانماغا چالیشیرلار.
Iranwire
